ព្រឹត្តិការណ៍ទេសចរណ៍កម្រិតអន្តរជាតិ​ចំនួន ៣ នឹងធ្វើឡើងនៅកម្ពុជា

លោក ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយ លោក Michael Cheow ប្រធានក្រុមហ៊ុន C. Michael International Sdn. Bhd. និងប្រតិភូវិនិយោគិនពីប្រទេសម៉ាឡេស៊ី នាថ្ងៃទី២ ខែមីនា។ នេះបើតាមសេចក្តីប្រកាសព័ត៌មានរបស់ក្រសួងទេសចរណ៍ ដែលក្នុងជំនួបការងារនេះ ប្រតិភូធុរកិច្ច​​ម៉ាឡេស៊ី បានស្នើសុំកិច្ចគាំទ្រពីក្រសួងទេសចរណ៍ លើការរៀបចំព្រឹត្តិការណ៍ជំរុញទេសចរណ៍កម្រិតអន្តរជាតិនៅកម្ពុជា។

លោក Michael Cheow បានបញ្ជក់ថា​ ព្រឹត្តិការណ៍ជំរុញទេសចរណ៍កម្រិតអន្តរជាតិចំនួន ៣ ដែលប្រតិភូធុរកិច្ច​ម៉ាឡេស៊ីគ្រោង​​រៀបចំ​នៅ​កម្ពុជានោះ រួមមាន ​១. មហោស្រពតន្ត្រីអន្តរជាតិ ដែលជាពិធីបុណ្យតន្ត្រីកម្រិតពិភពលោក​ដើម្បីអបអរសាទរទាំងទេពកោសល្យសិល្បៈសម័យទំនើប និងមរតកវប្បធម៌ដ៏សម្បូរបែបរបស់កម្ពុជា។​ ២. ការប្រណាំងទូកល្បឿនលឿនអាជីពដែលជាព្រឹត្តិការណ៍កីឡាលើទឹកដ៏រំភើបញាប់ញ័រនៅតំបន់ឆ្នេរដ៏ស្រស់ស្អាតរបស់កម្ពុជា ដើម្បីលើកកម្ពស់ទេសចរណ៍តំបន់ឆ្នេរ និងការយល់ដឹងពីបរិស្ថាន។

និង ៣. ការប្រណាំងរថយន្តកម្រិត GT (Grand Touring)​ ដែលជាព្រឹត្តិការណ៍ប្រណាំង​រថយន្តដ៏ឆ្នើមបង្កើតឡើងក្នុងគោលបំណងលើកកម្ពស់កេរ្តិ៍ឈ្មោះប្រទេសកម្ពុជា​ទៅកាន់មជ្ឈដ្ឋានអ្នកស្នេហាវិស័យយានយន្តអន្តរជាតិ និងក្រុមទេសចរដែលនិយមចំណាយខ្ពស់។

លោក Michael Cheow បានបង្ហាញទំនុកចិត្តយ៉ាងមុតមាំថា៖ «  ព្រឹត្តិការណ៍ទាំងនេះមិនត្រឹមតែជួយជំរុញសេដ្ឋកិច្ចក្នុងស្រុក និងបង្កើតការងារប៉ុណ្ណោះទេ ប៉ុន្តែថែមទាំងបង្ហាញពីការត្រៀមលក្ខណៈរួចរាល់របស់កម្ពុជា ក្នុងការធ្វើជាម្ចាស់ផ្ទះរៀបចំព្រឹត្តិការណ៍អន្តរជាតិខ្នាតធំ និងទំនើបៗផងដែរ។»។​

លោករដ្ឋមន្ត្រីក្រសួងទេសចរណ៍ បានវាយតម្លៃខ្ពស់ចំពោះគំនិតផ្តួចផ្តើមនេះ។ លើសពីនេះ លោក ហួត ហាក់ ​បានបញ្ជាក់ពីការគាំទ្ររបស់ក្រសួងទេសចរណ៍ ចំពោះការរៀបចំព្រឹត្តការណ៍ដ៏ធំ និងកម្រិតអន្តរជាតិជាលើកដំបូងនៅកម្ពុជា ក្នុងឆ្នាំ២០២៦ នេះ។ លោក ជឿជាក់ថា  ព្រឹត្តិការណ៍ទេសចរណ៍ទាំងនេះ នឹងក្លាយជាសមិទ្ធផលគួរជាទីមោទនៈសម្រាប់វិនិយោគិន និងផលប្រយោជន៍សេដ្ឋកិច្ចដ៏ធំធេងចំពោះប្រជាពលរដ្ឋកម្ពុជា។

ជាមួយគ្នានេះ លោករដ្ឋមន្ត្រីទេសចរណ៍ ក៏បានស្នើប្រធានក្រុមហ៊ុន និងប្រតិភូធុរជនម៉ាឡេស៊ី បន្តជួយផ្សព្វផ្សាយសារវិជ្ជមាន និងកត្តាសុខសន្តិភាពពីកម្ពុជាទៅកាន់ប្រជាជនម៉ាឡេស៊ីផងដែរ។ លោក ហួត ហាក់ អះអាងថា ៖ « កម្ពុជា នៅតែជាគោលដៅទេសចរណ៍សុខសុវត្ថិភាព ពោរពេញដោយសក្តានុពលខ្ពស់សម្រាប់ការវិនិយោគវិស័យទេសចរណ៍។»។​

​​ក្នុងឆ្នាំ​២០២៥  កម្ពុជា​ទទួល​បាន​ភ្ញៀវ​ទេសចរអន្តរជាតិប្រមាណ ៥,៥៧ លាននាក់។ ចំនួននេះ ថយចុះ ១៦,៩ភាគរយ បើ​ធៀប​នឹង​ឆ្នាំ២០២៤។ ការណ៍នេះ ក៏​ព្រោះតែវិបត្តិ​នយោបាយ និង​សេដ្ឋកិច្ច​សកល ព្រម​ទាំង​ជម្លោះ​​ព្រំដែន​បង្កឡើង​យោធា​ថៃ។  បើតាមរបាយការណ៍ពីក្រសួងទេសចរណ៍ ចំនួនទេសចរ​ជន​ជាតិ​ម៉ាឡេស៊ីដែលមកកម្សាន្តនៅកម្ពុជាក្នុងឆ្នាំ២០២៥ គឺមាន ៩៦ ២៦៨នាក់ កើនឡើង ២,១ភាគរយ។

ចំនួនភ្ញៀវទេសចរអន្តរជាតិទាំងជាង៥​​,៥៧លាននាក់ដែលកម្សាន្តនៅកម្ពុជានេះ បានមកនូវចំណូលប្រមាណ៣,៧ពាន់លានដុល្លារអាម៉េរិក ចាក់ចូលក្នុងចរន្តសេដ្ឋកិច្ចជាតិ៕