លោកស្រី វ្ល៉ាដាន់កា អាន់ឌ្រេវ៉ា(Vladanka Andreeva) អ្នកសម្របសម្រួលអង្គការសហប្រជាជាតិប្រចាំកម្ពុជា បានគូសបញ្ជាក់ថា ទីភ្នាក់ងារនានារបស់អង្គការសហប្រជាជាតិនៅកម្ពុជា នឹងបន្តពង្រឹងភាពជាដៃគូ ជាមួយក្រសួង-ស្ថាប័នកម្ពុជា សំដៅគាំទ្រដល់ដំណើរការអភិវឌ្ឍសង្គម-សេដ្ឋកិច្ចរបស់កម្ពុជា។ ការអះអាងរបស់លោកស្រី ធ្វើឡើងក្នុងពេលចូលជួបសម្តែងការគួរសម និងពិភាក្សាការងារ ជាមួយសម្តេច ហ៊ុន ម៉ាណែត នៅថ្ងៃទី២ ខែមីនា។
លោកស្រី វ្ល៉ាដាន់កា អាន់ឌ្រេវ៉ា លើកឡើងដូច្នេះ៖«ទីភ្នាក់ងារនានារបស់អង្គការសហប្រជាជាតិនៅកម្ពុជា នឹងបន្តភាពសកម្មរបស់ខ្លួន ដើម្បីបន្តពង្រឹងភាពជាដៃគូជាមួយក្រសួង-ស្ថាប័នកម្ពុជា សំដៅគាំទ្រដល់ដំណើរការអភិវឌ្ឍសង្គម-សេដ្ឋកិច្ចរបស់កម្ពុជា ស្របតាមយុទ្ធសាស្ត្របញ្ចកោណ ដំណាក់កាលទី១ ជាពិសេសការបង្កើតការងារ, ការបង្កើនជំនាញបន្ថែម (Upskilling), ការកសាងមូលធនមនុស្សជាដើម។»។
ក្រៅពីគូសបញ្ជាក់ ពីការគាំទ្ររបស់បណ្តាទីភ្នាក់ងារអង្គការសហប្រជាជាតិ លោកស្រី វ្ល៉ាដាន់កា ក៏បានវាយតម្លៃខ្ពស់ ចំពោះកិច្ចសហប្រតិបត្តិការដ៏ល្អ រវាងក្រសួង-ស្ថាប័នពាក់ព័ន្ធកម្ពុជា ជាមួយនឹងទីភ្នាក់ងារអង្គការសហប្រជាជាតិប្រចាំនៅកម្ពុជា នាពេលកន្លងមក។ អ្នកសម្របសម្រួលអង្គការសហប្រជាជាតិប្រចាំកម្ពុជា ក៏រំឭកការចូលរួមចំណែកយ៉ាងធំធេង របស់កម្ពុជាក្នុងអំឡុងពេល ២០ឆ្នាំកន្លងមក នៅក្នុងបេសកកម្មរក្សាសន្តិភាពពិភពលោក តាមរយៈការបន្តបញ្ជូនកងទ័ពមួកខៀវ ទៅបំពេញបេសកកម្មថែរក្សាសន្តិភាពក្រោមឆ័ត្រអង្គការសហប្រជាជាតិ។
ក្នុងឱកាសនៃជំនួប សម្ដេច ហ៊ុន ម៉ាណែត ស្វាគមន៍លោកស្រី វ្ល៉ាដាន់កា អាន់ឌ្រេវ៉ា ដែលបានមកបំពេញបេសកកម្មការងារជាលើកទី២ នៅកម្ពុជា។ ដូចលោកស្រី វ្ល៉ាដាន់កា ដែរ ប្រមុខរាជរដ្ឋាភិបាល ក៏បានវាយតម្លៃខ្ពស់ ចំពោះតួនាទីក្នុងភាពជាដៃគូរបស់អង្គការសហប្រជាជាតិ ក្នុងការគាំទ្រដល់ការរីកចម្រើនសង្គម-សេដ្ឋកិច្ចនៅកម្ពុជា ក៏ដូចជាការបន្តការគាំទ្ររបស់អង្គការសហប្រជាជាតិនៅកម្ពុជា ក្នុងដំណើរការនៃការចាកចេញពីចំណាត់ក្រុមប្រទេសដែលមានការអភិវឌ្ឍតិចតួច (LDC) ក្នុងឆ្នាំ២០២៩។
សម្ដេចនាយករដ្ឋមន្ត្រីហ៊ុន ម៉ាណែត ក៏បានគូសបញ្ជាក់ថា ក្រសួង-ស្ថាប័នពាក់ព័ន្ធកម្ពុជា នឹងបន្តធ្វើការយ៉ាងជិតស្និទ្ធ ជាមួយបណ្ដាទីភ្នាក់ងារអង្គការសហប្រជាជាតិ ប្រចាំនៅកម្ពុជា។
សម្ដេចហ៊ុន ម៉ាណែត ក៏មិនភ្លេចលើកពីការវិវត្តថ្មីៗ នៃស្ថានការណ៍តាមបណ្ដោយព្រំដែន កម្ពុជា-ថៃ ប្រាប់លោកស្រី វ្ល៉ាដាន់កា អាន់ឌ្រេវ៉ា ដែរ។ អំពីបញ្ហានេះ សម្តេច ហ៊ុន ម៉ាណែត បានគូសបញ្ជាក់ នូវជំហររបស់កម្ពុជា ក្នុងការដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ អនុសញ្ញា សន្ធិសញ្ញា និងកិច្ចព្រមព្រៀងទ្វេភាគីដែលមានស្រាប់រវាងប្រទេសទាំងពីរ។
ការដោះស្រាយភាពខ្វែងគ្នាដោយសន្តិវិធីរបស់ប្រទេសទាំងពីរ ដោយគោរពតាមធម្មនុញ្ញនៃអង្គការសហប្រជាជាតិ និងច្បាប់អន្តរជាតិ ក៏ជាបំណងរបស់អង្គការសហប្រជាជាតិ។ លោកស្រី វ្ល៉ាដាន់កា អាន់ឌ្រេវ៉ា បញ្ជាក់ដូច្នេះ។
ជុំវិញជំនួបរបស់លោកស្រី វ្ល៉ាដាន់កា អាន់ឌ្រេវ៉ា និងសម្តេច ហ៊ុន ម៉ាណែត ក៏ត្រូវបានអ្នក អង្គការសហប្រជាជាតិប្រចាំនៅកម្ពុជា ចុះផ្សាយខ្លីនៅលើបណ្តាញសង្គមដែរ។ ពីវេទិកាហ្វេសប៊ុក អង្គការសហប្រជាជាតិប្រចាំនៅកម្ពុជា គូសបញ្ជាក់ថាជំនួបនេះ បានផ្តល់ឱកាសដើម្បីពិភាក្សា អំពីកិច្ចសហប្រតិបត្តិការដែលកំពុងបន្ត រវាងអង្គការសហប្រជាជាតិ និងរាជរដ្ឋាភិបាលកម្ពុជា រួមទាំងអាទិភាពរួម ក្នុងការជំរុញការអភិវឌ្ឍប្រកបដោយចីរភាព និងគាំទ្រសុខុមាលភាពរបស់ប្រជាជនកម្ពុជា។ អង្គការសហប្រជាជាតិប្រចាំនៅកម្ពុជា បន្ថែមថា៖ «អង្គការសហប្រជាជាតិ បន្តកិច្ចសហការយ៉ាងជិតស្និទ្ធនេះ ក្នុងស្មារតីភាពជាដៃគូ និងការគោរពគ្នាទៅវិញទៅមក។»៕